"ەگەمەن قازاقستان" رەسپۋبليكالىق گازەتى" اكسيونەرلىك قوعامىنىڭ باسقارما ءتوراعاسى، حالىقارالىق تۇركى اكادەمياسىنىڭ پرەزيدەنتى، عالىم، پۋبليسيست دارحان ءقىدىرالى اقپارات جانە قوعامدىق دامۋ ءمينيسترى قىزمەتىنە تاعايىندالدى.
"مەملەكەت باسشىسىنىڭ جارلىعىمەن دارحان قۋاندىق ۇلى ءقىدىرالى قازاقستان رەسپۋبليكاسىنىڭ اقپارات جانە قوعامدىق دامۋ ءمينيسترى لاۋازىمىنا تاعايىندالدى" دەلىنگەن اقوردانىڭ باسپا ءسوز قىزمەتى تاراتقان حابارلامادا.
دارحان قۋاندىق ۇلى ءقىدىرالى 1974 جىلعى 16 ساۋىردە قازىرگى تۇركىستان، بۇرىنعى وڭتۇستىك قازاقستان وبلىسىنا قاراستى تۇلكىباس اۋدانىندا دۇنيەگە كەلگەن. ءال-فارابي اتىنداعى قازۇۋ-دە (1991-1992 ج) جانە تۇركيانىڭ مارمارا (1992-1996 ج)، دوكۋز ەيلۇل (1996-1997)، ەگەي (1997-1998 ج)، ىستامبۇل (1998-2001 ج) ۋنيۆەرسيتەتتەرىندە ءبىلىم العان. ىستامبۇل ۋنيۆەرسيتەتىندە دوكتورلىق ديسسەرتاسيا قورعاپ، فيلوسوفيا دوكتورى عىلىمي دارەجەسىن يەلەنگەن (2001 ج.). اباي اتىنداعى قازۇپۋ-دا دوكتورلىق ديسسەرتاسيا قورعاپ، تاريح عىلىمدارىنىڭ دوكتورى اتانعان (2010 ج).
ەڭبەك جولىن 2001 جىلى ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە اعا عىلىمي قىزمەتكەر بولىپ باستاعان. مۇنان سوڭ وقۋ ورنىنىڭ قابىرعاسىندا عالىم-حاتشى، كافەدرا مەڭگەرۋشىسى، اپپارات جەتەكشىسى، جەتەكشى عىلىمي قىزمەتكەر سەكىلدى قىزمەتتەر اتقارعان.
2005-2006 جىلدارى – ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە دوسەنت، اعا عىلىمي قىزمەتكەر.
2006-2007 جىلدارى – قازاقستان رەسپۋبليكاسى پرەزيدەنتتىك مادەنيەت ورتالىعىندا ديرەكتوردىڭ ورىنباسارى.
2007-2008 جىلدارى – قازاقستان رەسپۋبليكاسى ءبىلىم جانە عىلىم مينيسترلىگىندە ءمينيستردىڭ كەڭەسشىسى.
2008-2009 جىلدارى – قازاقستان رەسپۋبليكاسى پرەزيدەنتى اكىمشىلىگىندە ساراپشى، سەكتور مەڭگەرۋشىسى رەتىندە قىزمەت اتقارعان.
2009-2012 جىلدار اراسىندا قازاقستان رەسپۋبليكاسى پرەزيدەنتى باسپا ءسوز حاتشىسىنىڭ ورىنباسارى بولعان.
2012 -2014 جىلدارى تۇركى كەڭەسى باس حاتشىسىنىڭ ورىنباسارى بولىپ قىزمەت اتقاردى.
2014 جىلدان باستاپ حالىقارالىق تۇركى اكادەمياسىنىڭ پرەزيدەنتى.
2015 جىلعى 29 ماۋسىمنان تۇركى الەمى ۇلتتىق عىلىم اكادەميالار وداعى حاتشىلىعىنىڭ باسشىسى قىزمەتىن قوسا اتقارادى جانە اتالعان وداقتىڭ ۇيىمداستىرۋشىسى بولىپ سانالادى. 2015 جىلى يۋنەسكو-نىڭ پاريجدەگى شتاب-پاتەرىندە قورقىت مۇراسى جانە تۇركى الەمى اتتى حالىقارالىق مادەني شارانى، 2016 جىلى نيۋ-يورك قالاسىنداعى بىرىككەن ۇلتتار ۇيىمىنىڭ شتاب-پاتەرىندە 2030 جوسپارى ءۇشىن جىبەك جولى بويىنداعى جاڭا سينەرگيا اتتى حالىقارالىق سيمپوزيۋمدى ۇيىمداستىرعان.
2016 جىلدىڭ شىلدەسىنەن "ەگەمەن قازاقستان" رەسپۋبليكالىق گازەتى" اكسيونەرلىك قوعامىنىڭ باسقارما ءتوراعاسى بولىپ كەلدى.
عالىمنىڭ كوپتەگەن ىزدەنىستەرى تالاي كىتاپقا ارقاۋ بولعان. اتاپ ايتقاندا، قالامگەردىڭ مۇستافا شوقاي (انكارا، 2001 ج.)، تاراز تاريحى (تاراز، 2005 ج.)، تۇرىك حالىقتارى ادەبيەتى تاريحى، (ۇجىمدىق جيناق) (تۇركىستان، 2005 ج.)، مۇستافا شوقاي (استانا، 2007 ج.)، ۇلىق تۇركىستان (استانا، 2008)، اتىمدى ادام قويعان سوڭ... (استانا، 2008 ج.)، جەرۇيىق (استانا، 2009 ج.)، مۇستافا (استانا، 2012 ج.)، "ماڭگى تاس"، (الماتى 2015 ج.) سەكىلدى عىلىمي ەڭبەكتەرى جارىق كورگەن.
دارحان ءقىدىرالى عىلىمنىڭ دامۋىنا سىڭىرگەن ەڭبەگى ءۇشىن دارىن مەملەكەتتىك جاستار سىيلىعىمەن، پرەزيدەنتتىڭ العىس حاتىمەن، تۇركولوگيا سالاسىنداعى ۇزدىك جەتىستىكتەرى ءۇشىن كۇلتەگىن اتىنداعى سىيلىقپەن، تۇركى الەمىنە قىزمەت سىيلىعىمەن، جاڭا تۇركيا ستراتەگيالىق زەرتتەۋلەر ورتالىعى تاعايىنداعان تۇركى تاريحى جانە مادەنيەتىنە قىزمەت التىن مەدالىمەن، ۆەنگريانىڭ "وفيسەرلىك كرەست" وردەنىمەن، ازەربايجاننىڭ دوستلۋگ وردەنىمەن، اقپارات سالاسىنىڭ ۇزدىگى توسبەلگىسىمەن ماراپاتتالعان.
پىكىر قالدىرۋ